PANTUN INGATAN

PANTUN INGATAN
Jakarta, 02 September 2005
By : Ism

Pandan ghaye penuh di bake
Jalin dijemou di kemughu
Badan sare lagu dik pake
Tuhan ndak nulung kalu dik tau

Kayu aghe tinggi badahnye
Burung seranti patah tinggungan
Badan beduse laman mekue
Tuape di tanti lain tanggungan

Alihkah memate di lunggu’an
Dialihkah ke dalam ambinan bake
Ngalih mate ngalih rupu’an
Ngalih pule junjungan nyawe

Bahan cite di bawah ui
Kalu begune buat celane
Badan berete dunie sini
Amu kele entah kemane

Mbuat sumpit buluh batannye
Ikan ye kene payulah sintak
Jangan sempit hati li rete
Belum tentu ye sare kah mintak

Paye-paye aik lah nyenak
Ayik nye ulak penuh li ikan
Kaye li rete derite banyak
Kaye ye benae li dusun laman

Kalu ade jemoulah kasur
Di tengah aghi di pucuk ghumbai
Amu dunie jangan diukur
Beumput nyawe dikde kah sampai

Akae nangke meghesat-ghesat
Akae nyelimpat di tunggangnye
Ncakae rete dikde kah sesat
Sesat li care kite ncakaenye

Ambin bake bilah ditangan
Tepikkah saje di tengah laman
Miskin rete gilah hai badan
Asak jangan miskin pikiran

Ui nggak bemban begelindan
Batang mbaghangan layu sebelah
Mati badan pegilah badan
Mati iman jauhkah tulah

Bunge kederat batang di utan
Diambik bunge ye warne putih
Sesat melarat di dalam rupu’an
Tinggal dunie dikde ditulih

Kuini lebat di ujung ghangkah
Jangan sampai menimpe pandan
Di sini cumah badah ku singgah
Badah ngguk nian menanti badan

Kuini ghungkat badah bebindik
Ghungkat di timpe batang deghian
Di sini cuman badah beghusik
Ingatkan aku di peghusi’an

Batang besak penuh li ghangkah
Gahnting setangkai lah lemepai
Lemak-lemak di badah singgah
Masih lemaklah kalu lah sampai

Ude kite nanam gendule
Kah pacak jangan merusak padi
Mude dikde tue lah dikde
Kendak Ye Kuase pastil tejadi

Kalu payah badan besesah
Bawe ke ayik ilie nanjungan
Amu salah badan melangkah
Susah lah badan sepanjangan

Geminte keghe di pucuk dahan
Kalu lah lapae makani lepang
Derite dunie banyak empa’an
Amu di sane tanggungan sughang

Di muare jauh jale ku tebar
Datang keudang kene tesambar
Sare dunie pacak beendar
Amu di sane saling mbelasar

Kalu di laman ade titiran
Ambik pulut cukahi mikat
Amu badan pintar pikiran
Badan besiap sebelum namat

Basah tegahse di tulung buntu
Mbuat ghumah jangan tembaikah
Ye Maha Kuase tolonglah aku
Mintak di sane jangan tinggalkah